Dai rimedi de la nóna ai dulcamara modern: savè d’on temp e pubblicità

Milano, 5 dicembre 2017 -

Ogni settimana lo sguardo di Roberto Brivio affilato in decenni di satira, esercitata come attore, scrittore e chansonnier, illuminerà angoli della Grande Milano di oggi: i suoi vizi, le sue virtù e soprattutto la sua gente, da raccontare con irriverenza e tenerezza, come sa fare lui. E in lingua madre: il dialetto milanese.

Da on po' de temp la compar su la posta la scritta “Chiedilo alla nonna” che voltada in milanes l’è come dì “Domadeghel a la nòna”. Verament se dovariss dì “Mamagranda” dal frances “Grandmère”, ma dato che se sa no chi l’ha inventaa per primm l’è mei dì nòna, che l’è minga quella de Beethoven. Per confond minga i termini el sarìa mej dì nona, la o cont l’accento acutt, guzz ch’el gh’è minga su la tastera, ma la mia nevudina Carola de desdott mes che la tastera la dopra per sbattighi sora i man, la dis tranquillament nono, cont la boca a cu de gajna e l’accento sgar. Cossa l’è che se po’ domandà a la nòna? “el nomm di rimedi natural contra la cistite”, oppur “idea creativa per riciclà i vasett de veder e de plastica”, o “i remedi s’cètt per vinc l’Herpes”, e ancamò “come piang no quand se tajen i scigoll”, “che tipo de pediluvi se dev fa quand gh’hin i pè sgonfi”, “come usà el bicarbonà in di rezipe (ricette)”.

Roba de ridd in confront a i consili ver de ona nòna. La mia de Villasanta, Angela, ne saveva pussè d’on dottor. Per esempi: “per fa andà via i orziroeu se dev guardà in del boeucc del cess”; “Per fa andà via i vermen (tenia, ascaridi) se dev mandà gio’ on cuggiaa de caligine dislenguà in acqua tevedina”; “per guarì dal mal de panscia se dev quattà la part che la fa mal cont lumagon viv, sgussà e sbauscent, tegnù insema cont i foeuill de ninfea del lagh de Pusian”; “se el sangott (singhiozzo)a l’è senza tregua, se dev mett in co’ per mezzora ona sciavatta all’incontrari” ; “per fermà i emorragii applica per emostatic ragnèr polverent”; “se te gh’et la polmonite bev ona suppa de grappa calda” ; “per guarì dalla itterizia on cuggiaa d’acqua cont sett pioeugg de mandà giò viv. Denter el stòmich i bestiasc farann andà via quella pilisina che la fa nass el color giald” . Vedi on quaivun che el storta la bocca per el schivi. Del rest l’è minga domà la mia nòna che la gh’ha per el co’ sti rezipe. Anca i canzon popolar, quej che se cantava in di stall al temp de guerra, d’inverno, per scaldass, tra ona storia de stremizzi e muu di vacch, cont on coro che l’era bon de impostà anca trii vos. “ La gh’ha su i pioeucc (3 volt) fin sui oeucc: Rosina bella, raggio di stella, sulla toa bocca ghe metti on bel fior. Dai dai dai che la mangia i pures (3). Dai dai dai che l’è adrè a curass”. T’è capii? I Dulcamara a la Elisir d’amore a eren semper i vecc, i nonn, che ne saveven voeuna pussè del diaol.

In del fa ona regia dell’Opera de Donizetti hoo menzionà in on quader ‘sti robb. Me sembrava de vess Fellini cont i so’ ricord d’infanzia. A seguit de la scena dell’imbonitor n’hoo inventada voeuna “muta” in doa el ballett in veste de figurant special, tirava giò da la gratticcia (el soffit de legn del palchscenich) on poo de balloon (fumetti) cont denter i figure modern che te squassen tutt el dì cont invadenza. La pubblicità de la snellezza per la donna, cont la foto del prima e del dopo la cura, mai compagn fisionomicament, tant che la seconda la sembra de on’altra figurante; e quella della misura dell’omm, che te promett in 4 second, dopo la spalmada de ona crema, de diventà macho al cent per cent e de conquistà miè, morosa, amante, insema e cont prestazion ineguagliabil. Me fa vegni a la ment la pubblicità de duu prodòtt di ann ’60. “Voeurii tett de diva? Spalmii Curasen. Constatazion de on official giudiziari pagà de numm.” “Avii problem de misura? Cont Curapen ( la doveva vess la medesima crema adattada per l’occasion) spariran. Cont Curapen se diventa on stallon. Estensibilità fina a 1 meter e mezz.” Spaventeves no, l’era on moment de sospension, come fan in TV, de pubblicità, de consili per i acquist, domà cont on po’ de ironia, a ciappà in gir i dulcamara modern. Vun che el fa el venditor di canzon, nel senso de cantay in boca a la gent, a l’è Franco Visentin che mi hoo ciamà “Le chansonnier de la rive gauche del Navili”. Le conosssi da ona vita e da ona vita cantom insema anca in bicicletta. Su no se el va’ ancamò ma so che ona volta, prima di proeuv, el me fa fà on gir per andà all’Istituto Don Calabria al Parco Lambro, e, senza allenament, sont rivà stracch e cont el sedes piagaa per via del sellin de corsa che la gh’aveva la mia due ruote. Ma intanta gh’avevom mis in proeuva ona canzon.

Donca, mi el Franco l’hoo conossù quand l’aveva formà Gli Ombrelli insema a la Didi Martinaz e a Giorgio Médail. El m’aveva impressionaa per la grinta, la rabbia che el metteva nella vos, e per l’atteggiament semper de battalia. Depeu l’hoo vist ch’el faseva coppia cont el Valdi. E quand gh’avévi el circuito de teater Piemontes-Lombard-Venet, 30 sal per vun spettacol al mes ogniduna, el gh’emm fa tutt. L’è stà cont mi e la Raimondi anca nella selezion di Operett. Ghe fasevi fà on cammeo ch’el c’entrava nient ma appunto per quest el gh’aveva on success straordinari. E quand hoo programmà per on po’ de ann el Teater Ariberto el faseva cont i so’ canzon el cabaret final. Finì el spettacol de prosa, l’entrava lu a sipario chiuso e cantava i canzon pussè esilarant. Ogni tant se vedom ancamò. E lavorom insema cont gust. A l’è on grand professionista e quand el voeur, cont la soa vos a volt impegnada, a volt morbida, a volt sarcastica, a volt incassada, a volt dolza, el mett tutta la concorrenza al so’ post e ghe n’è per nissun. Incoeu l’è el so’ compleann. So no quanti a hinn. Forsi cent. La soa presenza nella musica, nel cabaret, nel teater, in di serad, cont el trio, cont el Valdi o deperlù, l’è pari al massim, a cent. E stasera allo Spirit de Milan, in doa sont stà invidà con Grazia Maria Raimondi (miè, cantante, attrice) e Maria Brivio(sorella, ex annunziatrice Rai che l’ha fàa cont lu el duo “poesie e canzon”), ghe ne auguraroo anca dusent.